Өзбекстан балаларға қылмыс істегендердің тізімін жасайды

Өзбекстан үкіметі кәмелетке толмағандарға қатысты қылмыс жасаған адамдардың реестрін жүргізу тәртібін бекітті, - деп хабарлайды Arbat.media.

Бұл туралы ӨР Олий Мәжілісі Сенатының төрағасы Танзила Нарбаева өзінің әлеуметтік желідегі ресми парақшасында жазды.

«Енді кәмелетке толмағандарға қатысты жыныстық зорлық-зомбылық жасаған адамдарға балалармен жұмыс істеуге қатаң тыйым салынады», - деп жазды Танзила Нарбаева өзінің Telegram арнасында.

Сондай-ақ ол сәуірде кәмелетке толмағандарға қатысты зорлық-зомбылық жасағандарға білім, бала тәрбиелеу, сауықтыру, шығармашылық ұйымдарда қызмет етуіне тыйым салатын заң қабылданғанын еске салды.

Кеше үкіметтің арнайы қаулысымен кәмелетке толмағандарға қатысты жыныстық зорлық-зомбылық жасаған адамдардың реестрін жүргізу тәртібі бекітілді.

Оған қасақана кісі өлтірген, кәмелетке толмағандардың ар-намысына қол сұққан, жасөспірімдер бейнеленген порнографиялық өнімді таратқан, жезөкшелер үйін ұйымдастырған, терроризм, сондай-ақ қылмыстың басқа да түрлері үшін бұрын сотталған адамдар енгізіледі.

Реестр арнайы ақпараттық жүйе арқылы жүргізіледі.

«Реестрге енгізілген адамдарды жұмысқа қабылдау мәселесі осы ақпараттық жүйеден алынған ақпарат негізінде бақыланады», - деп мәлім етті Танзила Нарбаева.