ЕУРО-2024: Словения мен Дания құрамалары тең түсті
Футболдан 2024 жылғы Еуропа чемпионатының үшінші ойын күнінде C тобындағы Словения мен Дания құрамалары тең ойнады, - деп хабарлайды Arbat.media.
Екі құрама қазақстандық жанкүйерлерге жақсы таныс. Екеуі қазақстандық футболшылармен бірге іріктеу кезеңінде H тобында ойын көрсетті, - деп жазады Kazinform агенттігі.
Ел құрамасы өз алаңында Данияны 3:2 есебімен жеңіп, сенсация жасаған болатын. Дегенмен, сырт алаңда оларға 1:3 есебімен есе жіберді.
Ал Словениядан екі ойында да 1:2 есебімен жеңіліп қалды. Соған қарамастан олармен кездесуде лайықты төтеп бере білді.
Бүгінгі кездесуде Словения мен Дания 1:1 есебіне қанағат білдірді.
Ойын барысында даниялық Кристиан Эриксен 17-минутта есеп ашса, словениялық Эрик Янжа таразы басын теңестіріп кетті.
Енді сағат 23:55-те С тобындағы Сербия мен Англия кездесуі өтеді.
Сондай-ақ, 16 маусымда D тобындағы тағы бір матчта Польша Нидерланд құрамасына 1:2 есебімен есе жіберді.
