АҚШ ресми түрде Израиль мен Иран арасындағы соғысқа кірісті
АҚШ президенті Дональд Трамп Ирандағы үш ірі ядролық нысанға американдық әскери-әуе күштері соққы жасағаннан кейін екі сағат өткен соң үндеу жасады, деп хабарлайды Arbat.Media MADENIPORTAL.KZ сайтына сілтеме жасап.
ВВС деректеріне сәйкес, Трамп Фордо, Натанз және Исфахан нысандары "толықтай" жойылғанын және бұл "айрықша әскери жетістік" екенін мәлімдеді.
"Енді Иран бейбіт келісімге келуі тиіс", — деді Трамп. Ол Иранда әлі де көптеген нысан бар екенін еске салып, келесі шабуылдар одан да жойқын болуы мүмкін екенін ескертті.
"Бұл бұлай жалғаса алмайды. Немесе бейбітшілік болады, немесе Иран үшін қайғылы аяқталады," — деді ол.
Трамп АҚШ пен Израиль әскерилеріне алғысын білдіріп, Америка болашақта мұндай терроризммен күрес әдістеріне жүгінуге мәжбүр болмаса екен деген үмітін жеткізді.
"Бүгін біз жасағанды басқа ешбір армия жүзеге асыра алмас еді," — деді ол.
Fox News мәліметінше, Иранның ядролық нысандарына шабуыл кезінде АҚШ алты ауыр бомбаны пайдаланған.
Атап айтқанда, жер астында терең орналасқан Фордо ядролық нысанын соққыға алу үшін GBU-57 үлгісіндегі алты қарсыбункерлік бомба қолданылған. Бұл бомбалар B-2 үлгісіндегі бомбалаушы ұшақтардан тасталған. Әр бомбаның салмағы 13 тоннaдан асады, және әр B-2 ұшағы екі бомба алып жүре алады.
Исфахан мен Натанздағы ядролық инфрақұрылым нысандарына шабуыл кезінде "Огайо" үлгісіндегі сүңгуір қайықтардан 30-ға жуық "Томагавк" қанатты зымырандары ұшырылған.
Исфахан ең күрделі нысан болды, — деп атап өтеді Fox News арнасының шолушысы Дженнифер Гриффин, әскери шенеуніктерге сілтеме жасай отырып.