Германия палестиналықтарға тағы 38 миллион еуро бөледі

Германия палестиналықтарға гуманитарлық көмек көрсету үшін тағы 38 миллион еуро бөледі, - деп хабарлайды Arbat.media.

Бұл туралы Германияның сыртқы істер министрі Анналена Бербок Рамаллаға сапары кезінде айтты.

Берлин 2023 жылы Палестина аумақтарына гуманитарлық көмек көрсету үшін бөлетін қаражаттың жалпы сомасы 160 миллион еуроны құрайды.

Германия сыртқы істер министрі Таяу Шығыстағы қақтығыстың екі мемлекетті шешім негізінде шешілуі керектігін тағы да баса айтып, Газа секторындағы гуманитарлық үзілістерді кеңейтуге шақырды.

Таяу Шығыстағы қақтығыстың шиеленісуіне ХАМАС-тың Израильге жасаған «айуандық шабуылы» себеп болғанымен, палестиналықтардың болашағы олардың бүгіні мен өткенінен жақсырақ болуы керек», - деді министр.