Алматыда «өмірін сақтандырмақ» болғандар алданып қалды
Алматыда сақтандыру инвестициясы деген желеумен жасалған алаяқтық схемасы әшкереленді, деп хабарлайды Arbat.Media.
Қаржы мониторингі агенттігінің хабарлауынша, 2013–2021 жылдар аралығында күдікті «Partners & Consultants» атты «Өмірді сақтандыру» жобасы арқылы өмірді сақтандыру бағдарламалары мен жинақтаушы сақтандыру салымдарына инвестиция салу деген сылтаумен азаматтардың ақшасын иемдену схемасын ұйымдастырған.
Азаматтарды өзіне бағынысты «Evroasia Global Investment» АҚ және «Evropa Investment» ЖШС есепшоттарына ақша аударуға үгіттеп, жылына 12%-ға дейін тұрақты табысқа кепілдік берген. Жобаның сенімді екенін дәлелдеу үшін шын мәнінде жоқ халықаралық сақтандыру бағдарламалары мен сертификаттарына сілтемелер қолданылған.
Қаражаттар қолма-қолсыз аударымдар арқылы қабылданып, салымшыларға жалған құжаттар берілген. 270 жәбірленушіге 620 млн теңгеден астам материалдық залал келтірілген.
Күдікті қаражатты жылжымайтын және жылжымалы мүлік сатып алуға жұмсаған. Аталған мүлікке шектеу қойылды.