Ақмолада жол апатына себепші болған жүргізуші 15 млн теңге айыппұл төледі

Ақмола облысында жол -көлік оқиғасына себепші болған жүргізуші 15 млн теңге айыппұл төледі, деп хабарлайды Arbat.Media.

Ол Екібастұз қаласынан Астанаға жолаушыларды тасымалдау кезінде өзімен бір бағытта қозғалып келе жатқан автокөлікке соқтығысқан.

Жол-көлік оқиғасы салдарынан артқы орындағы жолаушының бас сүйегі жарақаттанып, оң аяғы ампутацияланды.

Сотта айыпталушының шаршаңқы күйде көлік басқарғаны, жылдамдықты асырғаны анықталды.

Жәбірленуші айыпталушыны бас бостандығынан айырмауды сұраған.

"Сот үкімімен жүргізушінің 1 жылға бас бостандығы шектеліп, 1 жылға көлік құралдарын басқару құқығынан айырылды", - дейді Ақмола соты.

Жәбірленушінің пайдасына 15 млн теңгеден астам материалдық және моральдық шығын өндірілді.