Астанада 23 жастағы фельдшер Ұлдана Мырзуан қайтыс болды

8 қарашада кондиционердің құлауынан жарақат алған Ұлдана 18 қарашада өмірден озды. Бұл туралы Астана қаласының қоғамдық денсаулық басқармасы хабарлады, деп хабарлайды Arbat.Media.

Қызметтік борышын атқару кезінде жарақат алған фельдшер бірнеше күн өте ауыр жағдайда болды. Сол күні ол сағат 10:30 шамасында шақыртуға барып, әріптестеріне көмектескен. Оның күйеуі Әділет Зейнельдің айтуынша, Ұлдана екі зардап шеккенді сыртқа шығарып үлгерген. Алайда ер адамды көтерген кезде үстіне кондиционер құлап, басына тиген.

Ұлдана бес жыл фельдшер болып жұмыс істеді. Жақындары оған мамандығын өзгертуге кеңес берсе де, ол сүйікті ісінен бас тарта алмады. Сонымен қатар Ұлдана жақында ғана некелерін рәсімдеген.

— Егер ол қазір мені естісе, мен оған қатты сағынғанымды және өте жақсы көретінімді айтатын едім, - деді күйеуі.