Көкшетауда екі жыл бойы мемлекеттік субсидияға қол сұғып келген басшылар сотталды

Көкшетау қаласында агроөнеркәсіп саласында мемлекеттік субсидияларды жымқырған адамға үкім шықты, деп хабарлайды Arbat.Media.

ҚМА мәліметінше, «МолПродЖаркаин» ӘКК директоры мен «Рассвет» шаруа қожалығының басшысы екі жыл бойы мемлекеттен қаражат алып келген. Шаруа қожалықта құжатта көрсетілген көлемде сүт өндіруге жеткілікті мал басы болмаған. Соған қарамастан электрондық шот-фактуралар ақпараттық жүйесінде «МолПродЖаркаин» ӘКК-не 3 млн кг-нан астам шикі сүт жеткізілгені туралы жалған құжаттар рәсімделген.

Мемлекетке келтірілген жалпы залал 152 млн теңгені құрады.

«Тергеу барысында 6 жер учаскесіне, 4 пәтерге, 11 автокөлікке, мобильді ғимаратқа және өндірістік нысанға тыйым салынды», деп хабарлады ҚМА.