Конституциялық реформа: Президент өкілеттігі мерзімінен бұрын тоқтатылған жағдайда қолданылатын тәртіп түсіндірілді
Президент өкілеттігі мерзімінен бұрын тоқтатылған жағдайда қолданылатын тәртіпті әділет министрлігі түсіндірді, деп хабарлайды Arbat.Media.
Астанада Конституциялық реформалар бойынша түскен ұсыныстарды талқылауға арналған Конституциялық комиссияның екінші отырысы өтіп жатыр. Әділет министрі Ерлан Сәрсембаев президент қайтыс болған жағдайда қандай іс-қимыл алгоритмі ұсынылатынын айтты.
Ұсынысқа сәйкес, вице-президент өтпелі кезеңде биліктің тұрақтылығын қамтамасыз ету үшін жеткілікті легитимділігі бар жария лауазымды тұлға ретінде қарастырылады. Сонымен қатар, демократиялық рәсімді іске қосуда негізгі рөл Құрылтайға беріледі.
«Демократиялық билік сабақтастығын қамтамасыз ету мақсатында президенттің мерзімінен бұрын қызметтен босатылуы, қызметінен кетуі немесе қайтыс болуы жағдайында 7 күн ішінде Құрылтай президент сайлауын өткізу туралы шешім қабылдайды. Ал сайлау Құрылтай шешім қабылдаған күннен бастап екі ай ішінде өткізіледі», — деді Сәрсембаев.