Павлодар облысында ер адам әйелі мен үш баласын өрттен құтқарамын деп қаза тапқан

Павлодар облысында ер адам отбасын өрттен құтқарамын деп өзі көз жұмды, деп хабарлайды Arbat.Media.

Қайғылы оқиға кеше, 9 қазан күні таңертең Тереңкөл ауылындағы жеке тұрғын үйде болған. Өрт сөндірушілер оқиға орнына келгенде өрт үйдің шатырына дейін жеткен. Павлодар облысы төтенше жағдайлар департаментінің мәліметінше, құтқарушылар үйден ес-түссіз күйде жатқан 1982 жылы туған ер адамды алып шығып, жедел жәрдем қызметкерлеріне тапсырылған.

Марқұм өрт сөндірушілер келгенге дейін терезе арқылы 33 жастағы жұбайы мен 8, 6 және 2 жастағы үш баласын сыртқа шығарып үлгерген. Ер адам аудандық ауруханада көз жұмды.

Өрт үйдің шатырын шарпыған. Жалынның жалпы аумағы 100 шаршы метр болады. Өрттің шығу себебі анықталып жатыр.