Павлодарлық жасөспірімдер Жеңіс саябағын қорлады

Павлодарда жасөспірімдердің биі елдің ашуына тиді, деп хабарлайды Arbat.media.

Павлодарда жасөспірімдер Жеңіс саябағында ерсі би билеп, бейнені әлеуметтік желіге салды. Кәмелетке толмаған қыздар бейнеге «Жеңіс саябағын қорлаймыз» деп жазған.

Полицияның мәліметінше, оқиғаға қатысушылардың барлығы ата-аналарымен бірге бөлімшеге жеткізілген. Заңсыз әрекеттері үшін кәмелетке толмағандар әкімшілік жауапкершілікке тартылды.

«Балаларды тәрбиелеу жөніндегі міндеттерді тиісінше орындамағаны үшін заңды өкілдері де әкімшілік жауапкершілікке тартылды», - деп хабарлады Павлодар облысының полиция департаменті.

Сонымен қатар, Павлодар әкімдігі жанындағы кәмелетке толмағандардың істері және олардың құқықтарын қорғау жөніндегі комиссия да бұл іспен айналысатынын мәлімдеді.