Қарағандыдағы кафеде газ жарылып, екі адам қайтыс болды
Жарылыс 22 қаңтарда Ермеков көшесіндегі жедел тамақ әзірлейтін кафе-киосінде болды. Ғимарат ішінде 17 литрлік газ баллоны жарылып, өрт шықты, деп хабарлайды Arbat.Media.
Аймақтағы ТЖД төрт адам зардап шеккенін мәлімдеген еді. Бүгін, 28 қаңтарда, екі зардап шеккен адамның ауруханада қайтыс болғаны белгілі болды.
«Екі науқас та ауруханаға өте ауыр жағдайда жеткізілді. Келген сәттен бастап оларға жансақтау бөлімінде тәжірибелі мамандардың қатысуымен барлық қажетті арнайы медициналық көмек көрсетілді. Қабылданған емдік шараларға қарамастан, науқастар қайтыс болды», – деп хабарлады өңірлік денсаулық сақтау басқармасы.
Тағы бір зардап шеккен адам ауруханада жатыр, оған қажетті медициналық көмек көрсетілуде. Төртінші зардап шеккен адам үйіне жіберілген.