Қазақстанда орташа айлық жалақы 429 мың теңгеден асты

Қазақстанда орташа айлық жалақы 429 мың теңгеден асты, деп хабарлайды Arbat.Media.

Ұлттық статистика бюросының дерегінше, 2025 жылдың III тоқсанында Қазақстандағы орташа жалақы 10%-ға өсіп, 429 368 теңгені құрады.

Ең жоғары жалақы көрсеткіші кен өндіру және карьерлерді игеру саласында тіркелді — 922 274 теңге. Одан кейін қаржы және сақтандыру секторында — 883 611 теңге, ал ақпарат және байланыс саласында — 818 114 теңге. Кәсіби, ғылыми және техникалық қызмет саласындағы орташа жалақы 637 570 теңгені құрады. Ал ең төмен орташа жалақы білім беру саласында — бар болғаны 290 891 теңге.

Ең жоғары орташа айлық жалақы Маңғыстау облысында — 606 125 теңге, Атырау облысында — 602 752 теңге, ал Астанада — 569 647 теңге болды. Бұл өңірлерден кейінгі орында Ұлытау облысы (554 277 теңге) және Алматы қаласы (546 261 теңге) тұр. Шымкентте орташа жалақы 336 678 теңгені құрайды.

Ең төменгі жалақы Түркістан облысында тіркелген — бар болғаны 288 690 теңге.