Талғарда кісі қолынан қаза тапқан үш баланың әкесі жер қойнына тапсырылды

Талғарда кісі қолынан қаза тапқан ер адам жер қойнына тапсырылды, деп хабарлайды Arbat.Media.

27 жастағы марқұм бүгін жерленді. Оның артында үш баласы қалды. Марқұмды туыстары, Қызылқайрат ауылының тұрғындары ақтық сапарға шығарып салды.

Марқұмның әйелі қайғылы оқиға болған күні күйеуі оған қоңырау шалғанын айтты.

”Ол әпкесін қорғауға тырысты. Күдіктімен қақтығыс кезінде оқ тиді", - деді әйел.

Еске салайық, 6 қыркүйекте Талғар маңындағы Қызылқайрат ауылында жұртты дүр сілкіндірген қылмыс болды. Ер адам ауыл тұрғынын атып өлтіріп, оның кішкентай жиенін ұрлап кеткен. Кейінірек арнайы жасақ баланы құтқарып, анасымен қауыштырды. Күдікті ұсталды.