Ирландия Палестинаны тәуелсіз мемлекет ретінде мойындады

Ирландия да Палестинаны тәуелсіз мемлекет ретінде мойындады. Премьер-министр Саймон Харрис бұл шешімді «бейбітшілік пен қауіпсіздікте қатар өмір сүретін» екі тәуелсіз мемлекет құру арқылы израильдіктер мен палестиналықтар арасындағы қақтығысты шешуге деген «үмітті сақтау» ниетімен түсіндірді, - деп хабарлайды Arbat.media.

Харрис, сондай-ақ, Израиль армиясының Палестина анклавында Хамас лаңкестік қозғалысына қарсы жүргізіп жатқан әскери операциясына сілтеме жасап, Израиль премьер-министрі Биньямин Нетаньяхуды «халықаралық қауымдастықты тыңдауға және Газа секторындағы гуманитарлық апатты тоқтатуға» шақырды.

Ирландия үкіметі елдегі Палестина миссиясын елшілік мәртебесіне дейін көтеруге және Палестина елшісін тағайындауға рұқсат беруге дайын.

Бұған дейін Палестинаның тәуелсіздігін Норвегия мен Испания мойындаған болатын. Германия әзірге мұны жоспарлап отырған жоқ деп мәлімдеді.

Израиль наразылық ретінде Осло мен Дублиндегі елшілерін шақырып алды.