Ресейде келесі күзде әскерге электронды шақыру қағазын алады
Ресейде келесі күзде әскерге электронды шақыру қағазын алады, - деп хабарлайды Arbat.media.
2024 жылдың қазан-желтоқсан айларында ресейліктерді әскери қызметке шақыру әскери міндеттілердің бірыңғай тізілімі және жалпыға қолжетімді шақырулар журналы арқылы жүзеге асырылады.
Бұл туралы президент Путиннің Ресей Қорғаныс министрлігіне берген тапсырмасында айтылған.
Құжатта Ресей Федерациясының Қорғаныс министрлігі мен Цифрлық даму министрлігі азаматтарды әскери комиссариатқа жеке көрінбей-ақ әскери есепке алуды ұйымдастыруға, сондай-ақ шақыру қағазын электронды түрде таратуды қамтамасыз етуге міндетті делінген.
Сәуірде Ресей Федерациясының Мемлекеттік Думасы елде әскери қызметке міндетті адамдардың бірыңғай тізілімін құруды көздейтін түзетулер қабылдады.
Жаңа ережеге сәйкес, шақыру қағазы онда пайда болған немесе Мемлекеттік қызметтер порталына жіберілген сәттен бастап және адресаттың оны оқыған-оқымағанына қарамастан жеткізілген болып есептеледі.
Осы уақыттан бастап келмегені үшін әкімшілік жауапкершілік туындауы мүмкін.
Бұрын электронды тізілім ағымдағы жылдың соңына дейін іске қосылады деп болжанған болатын.
