Мораторий ағаш ұрлығын азайтады – прокуратура

Павлодар облысындағы орман қорының жартысынан астамы «Ертіс орманы» резерватының бірегей қарағайлы орманында шоғырланған. Прокуратура ағаш кесуге тыйым салу туралы мораторий орман ұрлығын азайтады деген пікірде, - деп хабарлайды Arbat.media.

Экожүйелерді қалпына келтіру климаттың өзгеруімен күресуде және орман қорын тұрақты дамыту саласындағы міндеттерге қол жеткізуде маңызды, - деп жазады Kazinform агенттігі.

«Облыстағы орман қорының жартысынан астамы «Ертіс орманы» қорығының бірегей қарағайлы орманында шоғырланған. Тәжірибе көрсеткендей, орман ағаштарын ұрлау фактілерінің көбеюі рұқсат етілген ағаш кесудің кез келген түрін енгізумен тығыз байланысты. Мысалы, алдыңғы мораторий алынған сәттен бастап, яғни 2021 жылы 1100 текше метрден астам орман заңсыз кесілген. Бұл ағаш кесуге тыйым салынған барлық кезеңдегі көрсеткіштерден айтарлықтай асып түсті», - деп хабарлады Павлодар облысының прокуратурасынан.

Орман шаруашылығы және жануарлар дүниесі комитетінің бұйрығымен 2029 жылдың 1 қаңтарына дейін «Ертіс орманы» резерваты аумағында ағаш кесуге тыйым салынды.