Семей қаласының жаңа әкімі тағайындалды

Семей қаласының жаңа әкімі болып Әділет Қожанбаев сайланды, деп хабарлайды Arbat.Media.

Семейде ел тарихында тұңғыш рет қала әкімінің тікелей сайлауы өтті. Сайлау қорытындысына сәйкес, қала әкімі болып Абай облысы Көкпекті ауданының бұрынғы басшысы Әділет Қожанбаев тағайындалды.

Еске салайық, 17 қыркүйекте әкімдіктің сайтында Семей әкімі болуға үміткер 4 азаматтың тізімі жарияланды. Олар:

• Қанат Шапатов — «Балалар мен жастардың шығармашылық сарайы» КМҚК директоры.
• Қаныш Төлеуов — «Геодезия, картография және құрылыс Жоғары колледжі» КМҚК директоры.
• Әділет Қожанбаев — ірі аумақтық бірліктерді басқару тәжірибесі бар жалғыз кандидат. Бақылаушылардың пікірінше, оны мемлекеттік органдардың негізгі кандидаты ретінде қарастыруға болады.
• Айболат Бекжасаров — уақытша жұмыссыз. Алайда, Семей мәслихатының сайтында оның қалалық мәслихат депутатының міндетін атқарғаны туралы ақпарат бар.

Бірақ тізімде бұған дейін Семей әкімі міндетін атқарушы Бекжан Бапышевтің болмауы күтпеген жағдай болды.