Су тасқыны: уақытша орналастыру пункттерінде 990 бала бар
Денсаулық сақтау министрлігінің соңғы мәліметінше су тасқыны басқан өңірлерде 1 мыңға жуық бала уақытша орналасу пункттеріне жеткізілді, - деп хабарлайды Arbat.media.
«Балаларға медициналық көмекке келетін болсақ, уақытша орналастыру пункттерінде 990 бала бар. Дәрігерлер үнемі тексеріп, әр баланың денсаулығын бақылауда. Денсаулық сақтау министрлігі, сондай-ақ барша медицина қызметкері алдағы уақытта да халқымыздың денсаулығы үшін жұмыс істеп, қиын-қыстау кезеңде мұқтаж жандарға көмек пен қолдау көрсетуді жалғастыра бермек», - деді министрліктің ресми өкілі Әйгерім Уразалиева Орталық коммуникациялар қызметі алаңында өткен баспасөз мәслихатында.
Министрлік өкілінің мәлімдеуінше, санитарлық-эпидемиологиялық мәселе де ведомствоның тұрақты бақылауында. Сумен жабдықтау нысандары, кәріздерге және зираттарға мониторинг күшейтілген.
