Теңгенің ұлттық валюта ретіндегі мәртебесін жаңа Конституцияда бекіту ұсынылды

Теңгенің ұлттық валюта ретіндегі мәртебесін жаңа Конституцияда бекіту ұсынылды, деп хабарлайды Arbat.Media.

Депутат Айдарбек Қожаназаров қазір теңгенің мәртебесі "Қазақстан Республикасының Ұлттық банкі туралы" заңмен реттелетінін, алайда әлемдік қаржы жүйесіндегі өзгерістер жағдайында ұлттық валютаның мәртебесін Конституция деңгейінде бекіту маңызды екенін атап өтті.

"Бұл – әлемдік тәжірибе. Әзірбайжан, Армения және Қырғызстан конституцияларында ұлттық валютаға қатысты нормалар бар. Ұлттық валютаны Конституцияда бекіту мемлекеттің экономикалық негіздерін нығайтып, валютаға қатысты кез келген күмәнді түсіндірмелердің алдын алады", – деді депутат.

Осыған байланысты депутат Комиссияға Конституция жобасына “Қазақстанның ұлттық валютасы – теңге” деген тармақ енгізу мүмкіндігін қарастыруды ұсынды.