Футболдан Қазақстан жастары алғашқы жеңісіне жетті
Футболдан 21 жасқа дейінгі Қазақстан жастар құрамасы 2025 жылғы Еуропа чемпионатына іріктеу сатысының төртінші ойынында Мальтамен кездесті, - деп хабарлайды Arbat.media.
В тобында сынға түсіп жатқандардың қарсыласы – Испания, Мажарстан, Шотландия, Мальта және Бельгия құрамалары.
Сырт алаңда өткен матчта қазақстандық жастар алаң иелеріне қарсы тегеурінде ойын көрсетті. Мальта әлсіз құраманың бірі болып отыр. Қазірге дейін төрт кездесудің барлығында қарсыласына есе жіберді.
Ойынның бірінші кезеңінде қос құраманың да есеп ашатын бірнеше мүмкіндігі болған еді. Кейбір сәтте оларға дәлдік жетіспесе, ендігі бір мезетте қақпашы мен қорғаушылар сауатты ойын көрсетті.
Екінші кезеңде Айбар Абдулла 53-минутта есеп ашса, 72-минутта Дамир Қасаболат басымдықты арттыра түсті.
Сөйтіп құрлықтық дода іріктеу сатысындағы алғашқы жеңісіне қол жеткізді. Есеп – 2:0.
