Қазақтың «Ортеке» өнері Қытайда танымал болды

Қазақтың мәдени мұрасы - «Ортеке» өнері Қытайда танымал болды. Қытай қазақтары туралы «Менің Алтайым» телехикаясындағы «Ортеке» биі түсірілген кадр қытайлық көрермендердің қызығушылығын тудырған, - деп хабарлайды Arbat.media.

Қытайлық Tik-Tok және Weibo әлеуметтік желілерінде «Ортеке» өнері туралы тақырып қызу талқыланып, Қытайдағы қандастарымыз «Ортеке» туралы көптеген видеолар жүктеген, - деп жазады Kazinform агенттігі.

Алтай аймағы Қаба ауданының қарт ұстазы Серік Қыдырмолла телехикаяда «Ортеке» күйін орындаған.

Серік Қыдырмолланың айтуынша, бұл қойылым бір кездері түрлі мереке-тойларда қазақ халқына кең тараған. Бірақ соңғы жылдары бұл өнер бірте-бірте жойылып барады.

Алайда, «Менің Алтайым» телехикаясы жас ұрпаққа қазақтың көне мұрасын нәсихаттауға мүмкіндік берген.

«Ортеке» биі 2022 жылы ЮНЕСКО-ның Материалдық емес мұрасының тізіміне енген болатын.

Қазақтың бұл көне өнері Қытайдағы қазақтар мекендеген Алтай аймағының материалдық емес мұралар тізіміне енген.