2026 жылы салық төлемеген шетелдік платформалар бұғатталуы мүмкін
2026 жылы салық төлемеген шетелдік платформалар бұғатталуы мүмкін, деп хабарлайды Arbat.Media.
Қаржы министрлігінің Мемлекеттік кірістер комитеті шетелдік интернет-компанияларға қатысты қосылған құн салығын әкімшілендіру нәтижесі мен жаңа шаралар жайлы мәлімдеді.
2025 жылы Қазақстанда 18 жаңа шетелдік компания тіркелді. Олардың қатарында Chess.com, OpenAI (ChatGPT әзірлеушісі), Canva, «Окко» сынды сервистер бар. Бұл салық салуда отандық және шетелдік цифрлық қызмет жеткізушілер үшін тең жағдай қалыптасып келе жатқанын көрсетеді.
2025 жылғы ірі салық төлеушілердің қатарына Temu – 6,2 млрд тг, Valve – 5,3 млрд тг, Apple – 5,2 млрд тг енді. Ал жаңа қатысушылар қатарында Next Retail Ltd. – 283 млн тг, Amazon.com 142 млн тг салық төлеген.
2026 жылғы 1 қаңтардан бастап ҚҚС төлеуден жалтарған немесе тіркелмеген шетелдік интернет-компанияларға Қазақстан аумағында бұғаттау шаралары қолданылады. Мұндай компаниялардың тізімі ресми түрде жарияланып отырады.
Министрліктің айтуынша, бұл қадам әділ бәсекелестікті қалыптастыруға, бизнес үшін тең жағдай жасауға және цифрлық экономиканы дамытуға бағытталған.