Астанада мас күйде көлік айдаған судьяның ісін Бас прокуратура қарайды

Астанада мас күйде көлік айдаған судьяның ісі Бас прокуратураға жолданды, деп хабарлайды Arbat.Media.

Ішкі істер министрлігінің мәліметінше, 1 қараша күні сағат шамамен 04:30-да «Хан Шатыр» сауда орталығы маңында полиция «Mazda-6» көлігін тоқтатқан. Көлік тізгінінде азаматтық істер жөніндегі ауданаралық соттың судьясы отырған.

Тексеру барысында оның мас күйде болғаны анықталды. Судья жарамдылық мерзімі өтіп кеткен жүргізуші куәлігімен жүрген.

«Осы оқиға бойынша материалдар Жоғары сот кеңесіне ұсыныс енгізу және судьяны заңда белгіленген тәртіппен жауапкершілікке тарту үшін Бас прокуратураға жолданды», – деп хабарлады ІІМ.