Мейрамхана қызметкерлері инсульт алған адамға дәрігер емес, полиция шақырды

Оқиға қарашада Алматыдағы Mysato мейрамханасында болған, деп хабарлайды Arbat.Media.

26 жастағы Жандос жаттықтырушы қызметін атқарған. Ол оқушысымен жарысқа барып, екеуі кафеге түстенуге барған. Сол мезетте жігіт өзін нашар сезініп, құса бастаған. Сөйтсе инсульт алған екен.

Марқұмның әпкесінің сөзінше, мекеме жігітке алғашқы көмек көрсетудің орнына полиция шақырған. Осылайша құзырлы орган өкілдері оны мастардың есін жиғызатын орынға алып кеткен. Тіпті жақындарына да хабарламаған. Алайда жігіт мүлде алкоголь тұтынбаған.

Кейін ата-анасы оны ауруханаға апарып, МРТ жасаған. Сол кезде миына қан құйылып кеткені анықталды. Жандосқа ота жасалған. Десе де ол комаға түсіп, сегіз күннен кейін есін жимай көз жұмған.

Ал полиция әлі де іс қозғамай, бір-біріне сілтеп жатқан көрінеді. Марқұмның жақындары әділ шешімге қол жеткізуге көмектесуді сұрады.