Вьетнамда ұсталған Қайсар Камза Қазақстанға жеткізіледі

Заңсыз онлайн-казиноны жарнамалау ісі бойынша іздеуде жүрген даулы блогер Қайсар Камза Қазақстанға қайтарылып келе жатқан болуы мүмкін, деп хабарлайды Arbat.Media.

Журналист Михаил Козачковтың мәліметінше, блогер Вьетнамның Камрань әуежайында Қазақстанның Қаржылық мониторинг агенттігінің қызметкерімен бірге байқалған. Егер бұл ақпарат расталса, Қайсар Камза Қазақстанға жеткізіліп, атышулы қылмыстық іс бойынша тергеуге тартылады.

Қайсар Камза әлеуметтік желілерде миллиондаған аудиторияға арналған треш-контенті арқылы танымал болды. Кейін оның есімі заңсыз онлайн-казиноларды жарнамалау ісіне қатысты тергеуде аталды. Тергеу нұсқасына сәйкес, 400 мыңнан астам оқырманы бар жабық Telegram-арна арқылы Қазақстанда тыйым салынған құмар ойындары насихатталған.

Қылмыстық іс қозғалғаннан кейін Камза Қазақстаннан кетіп қалған. 2026 жылдың сәуір айында ол Қазақстан Бас прокуратурасының сұрауы бойынша Вьетнамда ұсталған болатын.