Ер адам әйелі мен алты баласын атып, үйін өртеп жіберген

АҚШ-тың Мичиган штатында бір отбасының сегіз мүшесі қаза тапқан қайғылы оқиға болды, деп хабарлайды ,Arbat.Media.

Полицияның мәліметінше, ер адам әйелін және алты баласын атып өлтіріп, кейін үйді өртеп, өзі де суицид жасаған.

Оқиға 24 шілдеде Гранд-Хейвен қалашығында болған. Құтқарушылар үйдегі өрт туралы хабарлама алғаннан кейін оқиға орнына барған. Үйдің ішінен сегіз адамның денесі табылған. Қаза болғандардың арасында 39 жастағы Аманда Каролкевич, оның 47 жастағы күйеуі Кристофер Каролкевич және олардың алты баласы болған.

Балалардың жасы 5 пен 15 жас аралығында болған. Олардың төртеуі ерлі-зайыптылардың туған балалары, ал екі қыз асырап алынған балалар екені анықталған.

Алғашында полиция үйдегі өртті күдікті деп бағалап, қаза болғандардың кейбірінде оқ жарақаты барын хабарлаған. Кейін жүргізілген сот-медициналық сараптама нәтижесінде отбасының барлық мүшесі атыс қаруынан алған жарақаттан қаза болғаны анықталды.

Тергеушілердің мәліметінше, Кристофер алдымен әйелін және балаларын атып өлтірген. Содан кейін үйдің бірнеше жерінде әдейі өрт шығарған. Кейін ер адам өзіне қол жұмсаған. Полиция сырттан келген басқа күдіктіні іздемеген.

Марқұм Аманда Каролкевичтің жақындары оны отбасына берілген ана әрі балаларға қамқор ұстаз ретінде еске алды. Қайғылы жағдайдан кейін жергілікті тұрғындар отбасының үйінің алдына гүлдер, ойыншықтар мен естелік заттар қойып, марқұмдарды еске алған.

Қазіргі таңда тергеушілер қылмыстың нақты себебін анықтауға тырысып жатыр. Полиция бұл оқиғаны отбасын жоюға бағытталған кісі өлтіру және суицид ретінде қарастырып отыр.