СҚО-да Шат өзені тасып, адамдар көшірілді

Солтүстік Қазақстан облысы Ақжар ауданында арнайы қызметтер түні бойы жұмыс істеп, Талшық ауылындағы үйлерді су басуына жол бермеді. СҚО төтенше жағдайлар департаменті баспасөз қызметінің мәліметінше, 29 наурыз күні түнде Ақжар ауданындағы Шат өзенінің су деңгейі күрт көтеріліп, Талшық ауылының шетінде орналасқан үйлерді су басы қаупі туды, - деп хабарлайды Arbat.media.

Бұл туралы Kazinform агенттігі жазады

Жергілікті құтқарушылар, полиция қызметкерлері мен әкімшілік өкілдері бірлесе іс-әрекет етіп, ауылдағы 6 үйден 22 тұрғынды, соның ішінде 5 баланы эвакуациялады.

Тұрғындардың бір бөлігі ауылдағы мектеп-интернатта орналасқан эвакопунктке жеткізілсе, кейбірі туыстарына кетті. Су басу қаупі бар аймақтан 21 бас мал да шығарылды.

Оқиға орнында 20 адам, 10 техника жұмыс істеді.

Түні бойы атқарылған инженерлік жұмыстың нәтижесінде мұз құрсауы алынып, судың жолы ашылды.

Елдімекенді су басу қаупі жойылды. Таңертең тұрғындар аман-есен үйлеріне оралды.

Ешқайсысына медициналық көмектің қажеті болмады.

Жағдай мамандардың бақылауында.