ШЫҰ 2024 жылды Экология жылы деп жариялады

Биылғы 10-13 қазан аралығында Бейжің қаласында Қазақстанның төрағалығымен Қоршаған орта мәселелеріне жауап беретін Шанхай Ынтымақтастық Ұйымына (ШЫҰ) мүше елдердің министрліктері мен ведомстволары сарапшыларының отырысы өтті, - деп хабарлайды Arbat.media.

Бұл туралы ҚР Экология, геология және табиғи ресурстар министрлігінің баспасөз қызметі жариялады.

Қазақстан Республикасы биылғы шілде айынан бастап ШЫҰ-ға төрағалық етті. Қоршаған ортаны қорғау саласындағы ынтымақтастықтың маңыздылығын атап өтіп, 2024 жыл ШЫҰ Экология жылы болып жарияланды.

Осыған байланысты қазақстандық тарап бірқатар маңызды құжаттарды әзірледі: 2024 жылы ШЫҰ Экология жылын өткізу жөніндегі іс-шаралар жоспары, экологиялық проблемалардың тізілімі, ерекше қорғалатын табиғи аумақтарды және экологиялық туризмді дамыту саласындағы ынтымақтастық бағдарламасы, ШЫҰ-ға мүше мемлекеттердің үкіметтері арасындағы Қоршаған ортаны қорғау саласындағы ынтымақтастық туралы келісім, Мемлекеттер басшылары кеңесінің мәлімдемесі-Шанхай ынтымақтастық ұйымының мүшелері қалдықтарды тиімді басқару туралы.

Осы құжаттардың жобалары Бейжің қаласында өткен сараптамалық отырыс аясында талқыланды.