Мейірім Нұрсұлтанов Ташкентте жекпе-жек өткізеді

Қазақстандық кәсіпқой боксшы Мейірім Нұрсұлтанов (19-0, 11КО) Чили өкілі Хулио Аламосқа (16-1, 9КО) қарсы жекпе-жегі алдында салмақ өлшеу процедурасынан өтті, - деп хабарлайды Arbat.media.

М.Нұрсұлтанов орта салмақ санатының лимитінен аспай, таразы 72,5 келі көрсетті. Оның қарсыласының көрсеткіші – 72,3 келі.

Боксшылар салмақ өлшегеннен кейін дәстүрлі түрде көз арбасу рәсімін өткізді.

Нұрсұлтанов – Аламос айқасы 17 қараша кұні Өзбекстанның астанасы – Ташкентте өтеді. Жекпе-жек статусы – WBC желісі бойынша іріктеу кездесу.

Айта кетейік, жеңіліп көрмеген қазақстандық боксшы Мейірім Нұрсұлтанов Дүниежүзілік бокс ұйымының (WBO) нұсқасы бойынша 2023 жылдың орта салмақтағы үздік боксшысы атанды.

Сондай-ақ ол BoxRec.com сайтында салмақ дәрежесінен тыс қазақстандық боксшылар рейтингінде көш бастап тұр.