Қажылыққа барған 550 адам аптап ыстықтан көз жұмды

Сауд Арабиясында мұсылмандардың жыл сайынғы Меккеге қажылық сапары кезінде аптап ыстықтан жүздеген адам қайтыс болды. Қайтыс болған адамдардың нақты саны белгісіз, бірақ AFP агенттігінің хабарлауынша, тек қажылық кезінде кем дегенде 550 адам қайтыс болған. Қазақстан қажылық миссиясы Меккеге отандастарымыздың дін аман екенін жеткізді, - деп хабарлайды Arbat.media.

Оның ішінде 323-і Мысырдан келген.

Tunis Afrique Presse ақпарат агенттігінің хабарлауынша, құрбандар арасында Тунистің 35 азаматы бар.

Иорданияның Сыртқы істер министрлігі қажылыққа Иорданиядан барғандарды жерлеуге 41 рұқсат берілгенін хабарлады.

Иранның ИРНА ақпарат агенттігі 11 ирандықтың қаза тапқанын, тағы 24-і ауруханаға жатқызылғанын хабарлады.

Сондай-ақ үш Сенегал азаматы мен 144 Индонезия азаматының қайтыс болғаны айтылды. .

Бұл адамдардың көпшілігі қатты аптап ыстықтан қайтыс болды, деп хабарлады туыстары әлеуметтік желіде.

Сауд Арабиясының денсаулық сақтау министрлігі өте жоғары температура кезінде қажылыққа барушылар арасында ерекше өлім жағдайлары анықталмағанын мәлімдеді.

Қазақстан қажылық миссиясы Меккеге отандастарымыздың дін аман екенін хабарлады.

Қажылық миссиясының құрамында 4 дәрігер және 16 туроператордың әрқайсындағы 1 дәрігер ем-шарамен айналысып жатыр. Қазақстан қажыларының арасында қайтыс болған ешкім жоқ.

Миссиядағы дәрігерлер тобының жетекшісі Ардақ Айтбайұлының айтуынша, медициналық орталық көмегіне 14-16 маусым күндері 703 қажы жүгінген. Олардың қатарында жүрек-қан тамырлары, жоғары және төмен тыныс және асқазан-ішек аурулары, сондай-ақ басқа да (мазоль жарақаты, аллергия, конъюнктивит, т.б.) сырқат бойынша 120 қажы бірнеше рет тексерілген.

«15 маусымда Мұздалифада қан қысымы көтерілген қажыға жедел алғашқы көмек көрсетіліп, дәрігердің бақылауымен қонақүйге жөнелтілді. 16 маусымда Мина жазығында транзиторлық ишемиялық ұстама бойынша бір қажыға алғашқы медициналық көмек көрсетіліп, стационарға жатқызылды. Жамаратта шайтанға тас лақтырып келе жатқан жолда қанты төмендеп, есінен танып жатқан әйел адамға тез арада көмек көрсетіліп, ол да стационарға жеткізілді», - деді Ардақ Айтбайұлы.

Қазір науқастар дәрігерлердің толық бақылауында, жағдайы бірқалыпты. Одан бөлек, елден жеткізілген дәрі-дәрмек қоры да жеткілікті.

17 маусымда Меккедегі Масджид әл-Харам үлкен мешітінде ауа температурасы көлеңкеде 51,8 градусқа жетті, деп хабарлады Сауд Арабиясының телеарнасы.

2700-ден астам адамға қатты қызып кетуіне байланысты медициналық көмек көрсетілді.

Биылғы қажылық 14 маусымда басталып, 19 маусым күні кешке аяқталады.

Сауд Арабиясы статистика департаментінің мәліметінше, қажылыққа 1,8 миллион адам қатысып жатыр.