TikTok-та жаман сөйлеген: Семей тұрғыны 5 тәулікке қамалды

Абай облысында полиция TikTok-та тікелей эфир жүргізіп, былапыт сөздер айтқан 53 жастағы Семей тұрғынын анықтады, деп хабарлайды Arbat.Media.

Полиция мәліметінше, әйел эфир барысында ішімдік ішіп отырғанын әдейі көрсетіп, айналасындағыларға құрметсіздік танытқан. Тікелей эфирді шамамен 12 мың адам көрген.

Құқық бұзушылық жасаған әйелдің жеке басы жедел анықталды. Сот оны ұсақ бұзақылық жасағаны үшін кінәлі деп танып, жасына байланысты 5 тәулікке әкімшілік қамауға алу жазасын тағайындады.

Полиция әлеуметтік желілер де заң бұзушылыққа жол берілетін орын емес екенін еске салды. Ведомство әлеуметтік желілердегі құқыққа қайшы контентті анықтау және оның жолын кесу жұмыстарын жалғастыратынын мәлімдеді.

Полиция азаматтарды әлеуметтік желілерде де қоғамдық тәртіп пен заң талаптарын сақтауға шақырды.