Анналена Бербок Хамасты қаруын тастауға шақырады

Германия Сыртқы істер министрі Анналена Бербок Хамастың осыдан тура 6 ай бұрын Израильге жасаған шабуылын еске салып, радикал исламшылдарды қарсыласуды тоқтатуға шақырды, - деп хабарлайды Arbat.media.

«Хамас өзінің террорымен израильдіктер мен палестиналықтарға соғыс пен шексіз азап әкелді. Ол бұл азапты тоқтатып, кепілге алынғандарды дереу босатып, қаруын тастауы керек», - деп жазды Бербок X әлеуметтік желісінде.

Ол Хамастың Израильге шабуылы басталған күнді «қара күн» деп атады.

Хамас лаңкестері «жазықсыз балаларды, әйелдер мен ерлерді ерекше қатыгездікпен азаптап, зорлады және өлтірді», - деп атап өтті.

Сыртқы істер министрі олар әлі де адамгершілікке жатпайтын жағдайларда 100-ден астам адамды кепілде ұстап отырғанын айтты.

"Ұрланған әйелдер, ерлер мен балалар үшін 6 ай бойы қорқыныш пен үмітсіздік болды. Біз оларды Израильдегі жақындарына қайтару үшін жасаған күш-жігерімізден бас тартпаймыз", - деп жазды Бербок өзінің твиттердегі пікірінде.