Нобель сыйлығының лауреаты Бангладештің уақытша үкіметін басқарады
Бейбітшілік бойынша Нобель сыйлығының лауреаты Бангладештің уақытша үкіметін басқарады. 84 жастағы экономист Мұхаммед Юнусты тағайындау туралы шешім ел президенті мен Юнустың кандидатурасын талап еткен «Студенттер кемсітуге қарсы» наразылық қозғалысы жетекшілерінің кездесуінде қабылданды. Уақытша үкіметтің түпкілікті құрамы Бангладештегі саяси партиялармен кеңескеннен кейін анықталады, деп қосты президенттің баспасөз қызметі, - деп хабарлайды Arbat.media.
6 тамызда Бангладеш президенті уақытша үкіметті құру үшін парламентті таратқанын хабарлады. Бір күн бұрын 2009 жылдан бері Бангладештің премьер-министрі қызметін атқарған 76 жастағы шейх Хасина елден кетіп қалды. Хасинаның отставкаға кетуіне дейін 300-ге жуық адам қаза тапқан бірнеше аптаға созылған наразылықтар болды. Олардың кем дегенде 109-ы 5 тамыздағы тәртіпсіздіктердің құрбаны болған.
Сәрсенбі, 7 тамызда наразылық шерулерінде Бангладеш орталық банкі төрағасының төрт орынбасары сыбайлас жемқорлыққа қатысы бар деген айыппен отставкаға кетуге мәжбүр болғаны белгілі болды, деп хабарлайды Reuters.
