Алғаш рет қазақстандық Лондонның Құрметті музыканттар қауымдастығының Күміс медалін иеленді
Болашақ стипендиаты Рахат-Би Әбдісағин Лондонның Құрметті музыканттар қауымдастығының Күміс медалін иеленді. «Болашақ» бағдарламасының стипендиаты Рахат-Би Әбдісағин 2024 жылы Лондонның Құрметті музыканттар қауымдастығының беделді Күміс медалін алған алғашқы қазақстандық атанды. Бұл Ұлыбританияның ең көне және маңызды марапаттарының бірі. Салтанатты марапаттау рәсімі қараша айының ортасында Ұлыбритания астанасында өтті, - деп хабарлайды Arbat.media.
1889 жылы негізі қаланған Күміс медаль жыл сайын Ұлыбританияның жетекші консерваторияларының ең үздік жас музыканттарына беріледі, деп хабарлайды Ғылым және жоғары білім министрлігінің баспасөз қызметі, - деп жазады Kazinform агенттігі.
2024 жыл Рахат-Би Әбдісағиннің шығармашылық мансабындағы айтулы жыл болды. Ақпан айында ол Ұлыбританияның төрт соборында The Bruce операсының әлемдік премьерасын ұсынды. Бұл опера — Рахат-Бидің «Болашақ» бағдарламасы бойынша Шотландияның Корольдік консерваториясы мен Сент-Эндрюс университетіндегі докторлық зерттеуінің маңызды бөлігі саналады.
Сонымен қатар, Рахат-Бидің «Кванттық механика және авангардтық музыка» атты кітабы немістің беделді Springer баспасынан жарық көрді. Физика мен эксперименталды музыканың тоғысқан жеріндегі бұл бірегей зерттеу ғылыми және музыкалық ортада үлкен қызығушылық тудырды. Автор кітабын Нидерланд пен Германияның жетекші университеттерінде, соның ішінде Гейдельберг пен Амстердамда таныстырды. Бұдан бөлек, кітап Ұлыбританияның ең танымал және ірі кітап дүкендерінің бірі — Оксфордтағы басты кітап дүкенінің сөрелеріне қойылды.
«Математика, физика және музыканың арасындағы терең байланысты көрсете алғаныма қуаныштымын. Бұл өнер мен ғылымдағы жаңа идеяларға шабыт береді», — деді композитор таныстыру барысында.
Айта кетейік, Рахат-Би Әбдісағин — Еуропа, Азия және Америкадағы әйгілі концерт залдарында орындалатын 150-ден астам музыкалық шығармалардың авторы.
