Алматыдағы тұңғыш қазақ мектебіне 100 жыл толды
Республика сарайында Ш. Уәлиханов атындағы №12 мамандандырылған гимназияның 100 жылдық мерейтойына орай «Ғасыр мектебі» атты мерекелік концерт пен тарихи көрме өтті. Шараға Алматы әкімі Ерболат Досаев, Қазақстанның білім министрі Ғани Бейсембаев, педагогтар, мектеп түлектері мен оқушылары қатысты. Қала басшысы жиналғандарға Қазақстан Президенті Қасым-Жомарт Тоқаевтың құттықтау жеделхатын оқып берді, - деп хабарлайды Arbat.media.
«Шежірелі білім ордасы кезінде Алматы қаласындағы балаларды қазақ тілінде оқытқан бірден-бір мекеме болды. Шын мәнінде, өткен ғасырдағы ана тіліміздің тағдыры осы мектептің тарихымен тығыз байланысты. Оның ұстаздары заманның қиындығына қарамастан, ұлттық педагогиканың дәстүрін сақтап қалуға және ел мүддесіне қызмет еткен зиялы қауымның тұтас буынын тәрбиелеуге зор үлес қосты. Гимназияның мыңдаған түлегі елімізді өркендету жолында тынымсыз тер төкті. Олардың арасында халқымыздың мақтанышына айналған біртуар тұлғаларымыз аз емес», - делінген Мемлекеттік басшысының құттықтауында.
№12 мамандандырылған гимназияның жүз жылдық мерейтойы «Кеше.Бүгін.Ертең» ұранымен ұрпақтар сабақтастығын атап өтті. Мектеп тарихына арналған «Ғасыр мектебі» көрмесі гимназияның қалыптасу кезеңдерін ғана емес, сонымен қатар елдің орта білім беру жүйесінің дамуын да көрсетеді, - деп жазады Kazinform агенттігі.
Фото: Алматы әкімдігі
№12 гимназия Қазақ КСР Халық комиссарлары кеңесінің қаулысымен 1924 жылы 22 қазанда аймақтық тәжірибелік-көрме мектебі ретінде құрылды. Бастапқыда оның тек бір сатысы болды – бастапқы. 1936 жылы дәл осы мектеп республикадағы толық орта білім беру жүйесін бастады.
Фото: Алматы әкімдігі
Білім ордасы Социалистік Еңбек Ері, 15 жыл директор болған Қазақстанның еңбек сіңірген мұғалімі Рафика Нұртазинаның есімімен байланысты. Оның бастамасы бойынша мектепте орыс тілін оқытудың ғылыми-әдістемелік жүйесі жасалды.
Фото: Алматы әкімдігі
1972 жылы мектеп республикада бірінші болып ағылшын тілін тереетіп оқытуды енгізді, бұл үш тілді білетін мамандарды даярлауға ықпал етті.
Фото: Алматы әкімдігі
Мектеп 70-тен астам академик, 300-ден астам ғылым докторы, 500-ден астам ғылым кандидаттары мен көптеген мәдениет қайраткерлерін тәрбиеледі.
2007 жылдан бастап №12 мамандандырылған гимназия Алматының үздік ондығына кіреді. 2015, 2017 және 2020 жылдары гимназия «Үздік мектеп», «Үздік мекеме», «Үздік педагогикалық ұжым» наградаларымен марапатталды. 2022-2023 оқу жылдарында гимназия «Үздік мамандандырылған гимназия» атағына ие болды.
Фото: Алматы әкімдігі
100 жылдық тарихы бар қарашаңырақта елге елеулі үлес қосқан тұлғалар білім нәрімен сусындаған. Соның ішінде күміс көмей әнші Күләш Бәйсейітова, суретші Әбілхан Қастеев, Шара Жиенқұлова, Нұрғиса Тілендиев, Сыдық Мұхамеджанов, Әсет Бейсеуов. Мансұр Сағатов, мемлекет қайраткерлері Асқар Құлыбаев, Еркешбай Дербисов, академиктер Орынбек Жаутіков, Болат Жұбанов, Шора Сарыбаев және тағы басқа қоғам қайраткерлері мен мемлекет майталмандары бар.
