ШҚО-да майнерлерге бір қаланың жарығына тең заңсыз электр сатқан

Шығыс Қазақстан облысында майнингпен айналысатын кәсіпорындарға бірыңғай мемлекеттік сатып алушыны айналып өтіп, заңсыз электр энергиясын сату фактісі анықталды, деп хабарлайды Arbat.Media.

"Аймақтың бірнеше энергиямен жабдықтаушы компаниясы екі жыл бойы майнингтік кәсіпорындарды халықтың, әлеуметтік нысандардың және стратегиялық кәсіпорындардың қажеттілігіне арналған электр энергиясымен заңсыз қамтамасыз етіп келген. Тұтынылған электр энергиясының жалпы көлемі 50 мегаватт-сағаттан асқан, бұл 50–70 мың тұрғыны бар қаланың энергия тұтынуымен тең", – делінген ҚМА хабарламасында.

Электр энергиясын 9 миллиард теңгеден астам сомаға заңсыз сату фактісін ШҚО бойынша ҚМА департаменті ҰҚКД-мен бірлесіп анықтаған.

Ведомствоның түсіндіруінше, заң бойынша майнинг компанияларына электр энергиясын тек бірыңғай мемлекеттік сатып алушы арқылы және 1 мегаватт-сағаттан аспайтын көлемде ғана жеткізуге рұқсат етіледі.

"Қылмыстық жолмен алынған табысқа ұйымдастырушы елордадан екі пәтер және төрт автокөлік сатып алған. Олар сот санкциясымен ықтимал тәркілеу мақсатында тәркіленді", – делінген ҚМА мәліметінде.

Тергеу жалғасуда. ҚР ҚПК-нің 201-бабына сәйкес өзге ақпарат жария етілмейді.