Қазақстандық жүзу шебері Нұрдәулет Жұмағали Паралимпиаданың күміс жүлдегері атанды

Қазақстандық пара жүзу шебері Нұрдәулет Жұмағали Парижде өтіп жатқан Паралимпиада ойындарында жүлдегерлер қатарынан көрінді. Қазақстандық спортшы 100 метрге брасс әдісімен (SB13 санаты) жүзуде 1:04:83 нәтижемен мәре сызығын екінші болып қиды. Жүзудің бұл түрінен аталмыш қашықтықта Нұрдәулет әлем және паралимпиада рекордшысы, германиялық спортшы Талисо Энгельді (1:01.90) ғана алға жіберді. Қола жүлде әзербайжандық Вели Исрафиловқа (1:05.35) бұйырды, - деп хабарлайды Arbat.media.

Жарыс барысында Н.Жұмағали Азия рекордын жаңартты, - деп жазады Kazinform агенттігі.

Бұған дейін Нұрдәулет Токио Паралимпиадасында қола жүлде алған еді.

Осылайша, Париж Паралимпиада ойындарында Қазақстан қоржынына бесінші медаль түсті.

Еске сала кетейік, бұдан бұрын Ақмарал Науатбектің жазғы Паралимпиада ойындарының жеңімпазы атанғанын жазған болатынбыз.