Павлодар облысы: Тартылған инвестицияға 9 мың жұмыс орны құрылады

Павлодар облысында экономиканың оң өсімі байқалып отыр. Өңдеу өнеркәсібі жыл басынан бері 9,3 пайызға өсіп, 621 млрд теңгенің өнімі шығарылған, - деп хабарлайды Arbat.media.

Бұл туралы Kazinform агенттігі жазады.

Өнім көлемі көлік жасау саласында - 47%, резеңке және пластмасса бұйымдары өндірісінде - 45%, құрылыс индустриясында - 47%, металлургияда - 7%, мұнай өнімдерін өндіруде - 3,4% және жиһаз өндірісінде 82%-ға өсті.

«Жалпы тартылған инвестициялар 2 есеге ұлғайды. Өнеркәсіп өндірісінің өсу қарқынын және инвестициялардың өсімін сақтау мақсатында жалпы сомасы 2 трлн теңге болатын 50 жобамен жұмыс жүргізіліп жатыр. Бұл 9 мыңнан астам жаңа жұмыс орнын құруға және өнеркәсіп өндірісінің көлемін 400 млрд теңгеге дейін ұлғайтуға мүмкіндік береді. Жыл соңына дейін инвестиция көлемі 100 млрд теңгеден асатын 7 жобаны іске қосу жоспарланған», - деп хабарлады Павлодар облысының әкімдігінен.

Биыл Екібастұзда «EkibastuzFerroAlloys» компаниясы жылына 240 мың тонна ферросилиций шығаруға қауқарлы ферроқорытпа зауытын іске қосуды жоспарлап отыр. Бұл 800 жаңа жұмыс орнын құруға мүмкіндік береді.