Экскурсия кезінде қайғылы жағдай болды

Дубайда экскурсия кезінде әуе шары апатқа ұшырап, екі адам қаза болды. Ресейлік туристер ауыр жарақат алған, деп хабарлайды Arbat.media Azattyq Rýhy сайтына сілтеме жасап.

Оқиға Дубай шөлінде таңғы уақытта болған. Туристерді әуеге көтерген экскурсиялық рейсті Rayna Tours компаниясы ұйымдастырған.

12 турист мінген әуе шары көтерілу барысында қиындықтарға тап болған. Олардың ішінде екі ресейлік әйел — анасы мен қызы да бар. Куәгерлердің айтуынша, шардың тұрақты ұшуы қиын болған, ал ұшқан соң шамамен 40 минут өткенде, әуе шары бір жағына қатты қисайып, жерге қатты соғылып, себеті бірнеше рет домалап кеткен.

Оқиға салдарынан екі шетелдік азамат оқиға орнында көз жұмды. Қалған туристердің басым бөлігі ауыр және орташа ауыр жарақатпен ауруханаға жеткізілді. Ресей азаматтары түрлі дене жарақатын алғаны хабарланды.

Куәгерлер кей жолаушылардың апат кезінде себеттен сыртқа ұшып кеткенін айтты. Бұған қауіпсіздік белдіктерінің үзіліп кетуі себеп болған. Қалған жолаушылар жерге түскенде жарақат алып, шардың күмбезінің астында қалған.

Жарақат алғандар тікұшақтар мен жедел жәрдем көліктері арқылы ауруханаға жеткізілді. Оқиға бойынша БАӘ билігі тарапынан тексеріс жүргізілуде. Туристік компания Rayna Tours апаттың нақты себебін анықтау мақсатында жергілікті органдармен бірлесіп жұмыс істеп жатыр.