Ресейдің Краматорскіге соққысы: нысанашы өмір бойына бас бостандығынан айырылды

Ресейдің Краматорскіге соққысы: нысанашы өмір бойына бас бостандығынан айырылды. Украина соты Владимир Синельникті мемлекетке опасыздық жасады деп айыптап, өмір бойына бас бостандығынан айыру және мүлкін тәркілеу туралы үкім шығарды, - деп хабарлайды Arbat.media.

Украина прокуратурасының хабарлауынша, Ресей қарулы күштері 2023 жылы 27 маусымда Краматорск қаласындағы пиццерияға зымыраннан соққы беріп, 13 адам, оның ішінде төрт бала қаза тауып, тағы 64 адам жараланған.

Тергеу Синельниктің өзін «ДХР» деп жариялаған барлау офицеріне сол күні мейрамханада украин жауынгерлерінің болғанын көрсететін екі видео жібергенін анықтады. Осыдан кейін пиццерияға «Искандер-М» зымыран жүйесінен соққы болған.