Еліміздегі жол сапасына 19 мыңнан астам шағым түскен

Үкімет басшысы Әлихан Смайылов көлік министрлігі автожолдарға қатысты барлық жоспарланған жобаларды уақтылы іске асыруы қажет деп айтты, - деп хабарлайды Arbat.media.

«Басты мәселе – жол құрылысының сапасын қамтамасыз ету. Жол сапасының нашарлығы тұрғындардың наразылығына себепші болып отыр. Әсіресе, сапасыз жөндеу жұмыстарына қатысты айтылып жатқан сын көп. Тек осы жылдың өзінде мемлекеттік органдарға автомобиль жолдарына қатысты 19 мыңнан астам арыз-шағым келіп түсті», - деді Әлихан Смайылов.

Мысалы, жол азабын тартқан Қостанай облысының тұрғындары Ұзынкөл станциясы мен Троебратское ауылы арасындағы әбден тозып біткен жолға қатысты ұжымдық хат жазған. Бұл жол осы өңірді көршілес Солтүстік Қазақстан облысымен байланыстырады және Ресейге қарай транзиттік жол болып саналады. Биыл Ақтөбе облысының Жұрын станциясы мен Орқаш ауылы арасында қиыршық тас төселмеген сапасыз жол салынған.

Ал Тараз қаласының тұрғындары Қарасу шағын ауданында 1 жылдан астам уақыт бойы бітпей жатқан жол жөндеу жұмыстарын аяқтауды талап етіп келеді. Мұндай мысалдар барлық өңірде көптеп кездеседі.

«Әкімдіктер де жергілікті жолдардың сапасына сараптама жасау жұмыстарын да дұрыс жүргізе алмай отыр. Кейбір өңірлер құрылыс-монтаждау жұмыстарын техникалық қадағалау тарапынан бақылаусыз жүргізеді. Ұзақ жылдар бойы жол саласында шешілмей келген проблеманың бірі – битум тапшылығы. Тапшылықты импорт есебінен жабуға мәжбүр болып отырмыз. Битум бойынша пайдалану технологиясы сақталмайды. Бұл да жолдардың сапасына кері әсерін тигізіп отыр», - деді Ә.Смайылов.

Сонымен қатар әкімдіктер құрылыс және жол бойындағы қызмет көрсету нысандарының жобаларына арналған жер учаскелерін беру уақытын созуда. Осы факторлардың барлығы саланы дамытуға кедергі болып отыр.

«Көлік министрлігі әкімдіктермен бірлесіп, автомобиль жолдарына қатысты барлық жоспарланған жобаларды уақытылы іске асыруы қажет. Көлік министрлігі мен «Қазавтожол» компаниясы битумды сақтау инфрақұрылымын құру бойынша шара қабылдауы қажет. Сондай-ақ әкімдіктермен және жол активтерінің ұлттық сапа орталығымен бірлесіп, битум сақтау және пайдалану технологиясының сақталуын бақылауы керек. Ауыл шаруашылығы министрлігі Экология министрлігімен және әкімдіктермен бірлесіп, құрылыс және жол бойындағы қызмет көрсету объектілерін кеңейту жобаларына жер учаскелерін беру тәртібін оңайлатуды пысықтауы керек», - деді Үкімет басшысы.