Төтенше жағдайлар министрі ел тұрғындарына үндеу жариялады
Төтенше жағдайлар министрі Сырым Шәріпханов қазақстандықтарға үндеу жасады, - деп хабарлайды Arbat.media.
"30 желтоқсаннан 3 қаңтар аралығында ТЖМ бөлімшелері төтенше жағдайларға жедел ден қою үшін қызметтің күшейтілген режиміне көшті. Күштер мен құралдар тұрақты дайын тұр.
Мереке күндері ауа райының қолайсыздығына байланысты азаматтардан дауылды ескертулерді, ауа райының өзгеруін, жолдардың жабылуы туралы хабарламаларды бақылауды, сондай-ақ алыс сапарға шықпауды сұраймын.
Ауылдық жерлерде тұратын тұрғындарға ауа райы нашарлаған жағдайда алыс қашықтыққа жаяу жүруден бас тартуды ұсынамын.
Қазір ауа райының күрт жылынуына байланысты еліміздің кейбір өңірлерінде су айдындарында мұздың жұқарғаны байқалады. Осыған байланысты азаматтардан жұқа мұзға шықпауды және қауіпсіз жүріс-тұрыс ережелерін қатаң сақтауды сұраймын!" делінген хабарламада.
Министр жаңажылдық іс-шараларды ұйымдастырушылар мен азаматтарды өрт қауіпсіздігі ережелерінің талаптарын сақтауға шақырды. Үй-жайда отшашулар мен өртке әкелуі мүмкін басқа да өрт қауіпті жарық әсері бар құралдарды пайдалануға болмайтынын ескертті.
"Пиротехникалық құралдарды абайсыз қолдану өрттің пайда болуына ғана емес, сонымен қатар жарақат пен мертігуге әкелуі мүмкін екенін еске саламын.
Сонымен қатар, тұрмыстық өрт қауіпсіздігі ережелерін сақтап, балаларды ересектердің қарауынсыз қалдырмау қажет.
Қарапайым ережелерді сақтау сіздің және жақындарыңыздың өмірі мен денсаулығын сақтауға мүмкіндік береді.
Жаңа жыл отбасылық мереке екенін ескере отырып, оны үйде отбасымен қарсы алуды ұсынамын", - деп түйді сөзін Сырым Шәріпханов.
