Елена Рыбакина Мадридте 18 жастағы теннисшіні жеңіп, ширек финалға шықты

Қазақстанның бірінші, әлемнің 4-ракеткасы Елена Рыбакина Мадрид WTA 1000 турнирінің ширек финалына шықты. Қазақстандық теннисші төртінші айналымда дүниежүзілік рейтингіде 136-орында тұрған чехиялық, 18 жастағы Сара Бейлекпен кортта алғаш рет кездесті. Матч брейк алмасумен басталғанымен, Рыбакина ойынын тез түзеп, 4:1 есебімен алға шықты. Сетті жарты сағатта тағы бір брейкпен бітірді – 6:1, - деп хабарлайды Arbat.media.

Екінші партияда есеп 3:2 болған мезетте Елена брейк жасағанымен, Бейлек сол бойда қарымта қайырды, - деп жазады Kazinform агенттігі.

Дегенмен қазақстандық спортшы тағы бір брейктен кейін үшінші матчболын мүлт жіберген жоқ – 6:3.

Бір сағат 16 минутқа созылған бәсеке барысында Рыбакина эйс жасамағанымен, 10 брейк-пойнттың алтауын пайдаланды. Бейлек 1 эйс, 2 брейкпен (14 брейк-пойнт) шектелді.

Елена Рыбакина жартылай финалға шығу үшін әлемнің 11-ракеткасы, ресейлік Дарья Касаткина немесе рейтингіде 50-сатыдағы тағы бір қазақстандық Юлия Путинцеваның қай жеңгенімен таласады.