Байден Қытайдың Ресей әскери өнеркәсібіне қолдау көрсетуін айыптады

Байден Си Цзиньпинмен кездесуінде Қытайдың Ресей әскери өнеркәсібіне қолдау көрсетуін айыптады. АҚШ-тың қазіргі президенті Джо Байден мен Қытай төрағасы Си Цзиньпин Перу астанасы Лимада өткен Азия-Тынық мұхиты экономикалық ынтымақтастығы (АТЭС) форумы аясында кездесіп, бірқатар екіжақты және жаһандық мәселелерді талқылады, - деп хабарлайды Arbat.media.

Атап айтқанда, Байден Си Цзиньпинді «ҚХР-ның Тайвань төңірегінде тұрақсыздандыратын әскери әрекеттерін тоқтатуға» шақырды және Қытайдың «әділетсіз сауда саясаты» мен ҚХР-ның жалғасып жатқан кибершабуылдарына алаңдаушылық білдірді.

Джо Байден мыңдаған Солтүстік Корея әскерінің Ресейге орналастырылуын да айыптап, бұл фактіні «Ресей Федерациясының Украинаға қарсы заңсыз соғысының қауіпті кеңеюі» деп атады.

Ақ үй басшысы Қытайдың Ресейдің қорғаныс-өнеркәсіптік базасына қолдау көрсетуіне де қатты алаңдайды.

Өз кезегінде Си Цзиньпин Дональд Трамптың атын атамай, АҚШ-тың жаңа әкімшілігімен жұмыс істеуге дайын екенін мәлімдеді.

Оның айтуынша, Қытай мен Америка Құрама Штаттарының тұрақты қарым-қатынасы «адамзаттың болашақ тағдыры» үшін өте маңызды.

«Ақылға қонымды, дана таңдау жасаңыз», - деп келтіреді AP Қытай басшысының сөзін.