Бельгиялықтар асырап алған баланың анасына қатысты тың дерек
Әлеуметтік желіде бельгиялық отбасы асырап алған 21 жастағы Эдди Жан Қазақстандағы туған ата-анасын іздейтіні туралы ақпарат тараған болатын, - деп хабарлайды Arbat.media.
Оған дүниеге келгенде Жәнібек деген есім берілген. Алайда, қазір Эдди Жан өзін Мұрат деп атап жүр. Мұрат біраз уақыт өзі туған жерді аралап, анасын іздеді. Енді ол анасын көрмейінше қайтпайтынын айтады.
Белгілі тележүргізуші, журналист Қымбат Досжан әлеуметтік желіде Мұраттың оқиғасына қатысты жаңа дерек жариялады.
Оның сөзіне қарағанда, Мұраттың анасын іздеу күн өткен сайын қиындап барады.
Өйткені құжат күйінде де көп нәрсе белгісіз. Журналист "Бармысың, бауырым?" редакциясы бұл мәселені жан-жақты зерттеп жатқанын жеткізді.
- Жекеге түскен хат-қоңырауда сан жоқ. Соңғы 2 күнде үндемей отырғанымызға алаңдаған жандар да көп, арасында бізді жамандағандар да жоқ емес. Біз, "Бармысың, бауырым?" хабарының редакциясы өз жұмысымызды білеміз. Бірнеше мемлекеттік мекемеге хат жазып, ресми мәліметтер алдық. Ақпарат тапқан сайын оны жақсылап зерттемей, жалаулатып жариялай салуға тағы болмайды. Білсіздер ме, бұл жұмбақты шешкен сайын түйіншегі керісінше тастай түйіліп бара жатыр... Перзентханаға жедел жәрдем арқылы келген, қабылданған, босанған, төрт күн төсегінде түнеген келіншектің жеке құжат көшірмесі әлі табылған жоқ. Бар құжаттың қалай толтырылғанын міне, әдейі көрсетіп отырмыз. Нәресте өмірге келгендегі мәліметті, яғни 2002 жылдың қаңтарында дәрігер Совет одағынан қалған "Путевой лист грузового автомобиля, Талон заказчика" деген 1983 жылы әзірленген бланкіге түсініксіз жазумен жаза салған... Қай жағынан келсек те, ресми құжаттарда жазылған келіншектің аты-жөні өтірік сияқты... - делінген журналистің жазбасында.
Қымбат Досжан баланың анасы болуы мүмкін деген күдікпен үш әйелдің бірі ДНҚ сынамасын тапсырғанын мәлімдеді.
- Үш апталық зерттеу жұмысынан шыққан нәтиже: қазір үш келіншекке күдік басым. Кеше "Бармысың, бауырым?" хабарының редакторы Әсел Асқарқызы сол үш келіншектің бірін ДНҚ тест жасайтын лабораторияға ертіп барды. Енді нәтижесін күтіп отырмыз. Лабораторияға Жәнібек (Мұрат) те барды. Испанияға қайтқан жоқ, әзірге Қазақстанда. Бірақ бірден айтайық, көптің тілеуі, біздің басты мақсат - сонау жерден мейірімге шөлдеп келген баланың анасын тауып беру. Кей әйелдің әлемін білесіздер, қиындыққа толы. Баласынан бас тартқанда, басқа жол көрмей, жақыннан қолдау таппай, сондай шешімге баруға мәжбүр болған. Сондықтан туған анасына қатысты ауыр сөз жазбаңыздар. Иә, қателескен шығар, бірақ ол да адам. Оның да құқығы бар, - деген автор.
Сондықтан егер ДНК тест нәтижесі бойынша келіншек баланың туған анасы болып шықса, редакция ол келіншектің фотосын әлеуметтік желіден де, эфирден де көрсетпейтінін мәлімдеді. Аты-жөнін де атамай, құпия сақтамақ.
- Баласымен ғана табысады, танысады. Біз о бастан құпия болады деп уәде бердік, сол сөзімізде тұрамыз. Егер бұл келіншек баланың туған анасы болмай шықса, зерттеу жұмысы жалғасады, - дейді Қымбыт Досжан.
