Маңғыстауда мектеп оқушылары жаппай уланды

Маңғыстау облысындағы Бейнеу ауылындағы жалпы білім беретін мектептердің бірінің оқушылары улану белгілерімен ауруханаға түсті, деп хабарлайды Arbat.media. 

Ресми ақпарат бойынша, көмек көрсетілгеннен кейін олар үйлеріне жіберілді. Санитарлық-эпидемиологиялық инспекторлар мектеп асханасынан сынама алды.

Бейнеу әкімдігі баспасөз қызметінің хабарлауынша, 1 сәуір кешке Бейнеу орталық аудандық ауруханасының жедел жәрдем бөліміне оқушылар келді. 9 бен 12 жас аралығындағы 11 бала түсті. Барлығы жүрек айну, құсу, әлсіздікке шағымданды. Тексеріліп, қажетті медициналық көмек көрсетілгеннен кейін ауруханаға жатқызу белгілері болмағандықтан, үйлеріне жіберілді. Қазіргі уақытта балалардың денсаулығына қауіп төніп тұрған жоқ, олар амбулаторлық ем қабылдап жатыр.

Облыстық денсаулық сақтау басқармасы балаларға функционалдық дисфиксия диагнозы қойылғанын хабарлады. Яғни тағамды тұтынудан кейінгі ас қорыту бұзылысы байқалған.

"Бейнеу аудандық санитарлық-эпидемиологиялық бақылау басқармасының мамандары жедел тексеру жүргізіп, азық-түлік өнімдерінен зертханалық тексеру үшін сынама алып, тиісті санитарлық-профилактикалық іс-шаралар жүргізіп жатыр", – деп хабарлады Бейнеу әкімдігі.