Самат Әбішке қатысты қылмыстық істі тергеу аяқталды
Ұлттық қауіпсіздік комитеті төрағасының бұрынғы бірінші орынбасары Самат Әбішке қатысты қылмыстық іс бойынша тергеу аяқталды. Іс сотқа жіберілді, - деп хабарлайды Arbat.media.
Бұл туралы Kazinform агенттігі жариялады.
«ҚР Бас прокуратурасының Cотқа дейінгі тергеп-тексеру қызметі С.Әбішке қатысты қылмыстық істі тергеуді аяқтағанын хабарлаймын. ҚР Қылмыстық кодексінің 362-бабының 4-бөлігі бойынша іс қозғалып, сотқа жолданды», - дейді аталған қызметтің басшысы Ризабек Ожаров.
Осы қылмыстық іс аясында Самат Әбіш ауыр салдарға әкеп соқтырған билігін және қызметтік өкілеттігін асыра пайдаланды деген күдікке ілінген. Күдіктіге қатысты ешқайда кетпеу туралы бұлтартпау шарасы қабылданған. Ол қазір Қазақстан аумағынан шықпаған.
«Қылмыстық істе мемлекеттік құпияларды қамтыған мәліметтер бар екенін ескере отырып, сотқа дейінгі тергеп-тексеру деректері жария етілмейді», - деп аталып өткен хабарламада.
Айта кетейік, бұрынғы Ұлттық қауіпсіздік комитеті төрағасының бірінші орынбасары Самат Әбішке қатысты тергеу ісі қаңтар оқиғасы кезінде қызметін асыра пайдаланғаны үшін тағайындалған болатын.
