Тергеу: Ұялы байланыс тарифті 7,7%-дан 57,3%-ға дейін көтерген

2023 жылы ұялы байланыс операторлары тариф жоспарлары бағасын 7,7%-дан 57,3%-ға дейін көтерген, тергеу басталды, - деп хабарлайды Arbat.media. 

ҚР Бәсекелестікті қорғау және дамыту агенттігі абоненттердің тариф жоспары мен ұялы байланыс қызмет бағасын көтеру туралы өтінішін қарады.

Ведомство 2023 жылы ұялы байланыс операторларының тариф жоспарларына сәйкес бағаның 7,7%-дан 57,3%-ға дейін айтарлықтай өсуі тіркелгенін анықтады.

2023 жылдың мамыр-шілде айлары аралығында ұялы байланыс операторлары ай сайынғы абоненттік төлемі бар 30-дан астам тариф жоспары бойынша қызмет құнын тұрақты түрде арттырды.

Қазір "Кселл" АҚ, «МТ-S» ЖШС (Tele2/Altel) және «Кар-Тел» ЖШС (Beeline) ұялы байланыс операторларына қатысты тергеу басталды.

Сондай-ақ, ұялы байланыс операторларының тарифтік жоспарларда бір минуттық сөйлесу және бір SMS үшін қоңырау құнын белгілеу әрекеттерінде (бұл қызметтер бір бірлік үшін төленеді) бәсекелестікке қарсы келісілген әрекеттердің белгілері анықталған. Операторларға бағаның төмендеуі туралы хабарланды.

Егер операторлар ескертуді көрсетілген мерзімде орындамаса, Агенттік тексеру жүргізеді.