Жамбыл облысында жүкті келіншек белгісіз жағдайда комаға түсіп, баласынан айырылды

Шу қалалық ауруханасында жүкті әйел комаға түсіп, жаңа туған нәрестесі шетінеп кетті, деп хабарлайды Arbat.media.

Бұл туралы алғашқылардың бірі болып Egovpress Telegram арнасы жазды. Кейін Жамбыл облысының денсаулық сақтау басқармасы ақпаратты растады. Алдын ала мәлімет бойынша, 33 апталық жүкті әйел преэклампсия белгілерімен ауруханаға түскен. Жағдайы ауыр болғандықтан, жедел кесар тілігі жасалған. Алайда нәрестені аман алып қалуға мүмкіндік болмапты.

“Қазір әйелдің жағдайы тұрақты, дәрігерлердің бақылауында. Ол бірнеше рет гинекология және перинатология ғылыми орталығы мамандарымен, соның ішінде Шу қаласына келген арнайы топпен кеңесті”, – деп хабарлады басқарма.

Дәрігерлер емдеу бекітілген медициналық хаттамаларға сәйкес жүргізіліп жатқанын және барлық қажетті дәрі-дәрмекпен қамтамасыз етілгенін мәлімдеді.